మానవత్వం చాటుకున్న మేస్త్రి: తోటి కార్మికుని కుమార్తె పెళ్లికి రూ. 70 వేల ఆర్థిక సాయం!

పయనించే సూర్యడు మార్చి 13 సూర్యాపేట జిల్లా నడిగూడెం ప్రతినిధి పొలంపల్లి వెంకటేశ్వర్లు : కష్టం చేసే చేతులకే కాదు, ఆ కష్టాన్ని పంచుకునే గుండెకూ తానే సాటి అని నిరూపించుకున్నారు తాపీ మేస్త్రి వల్లెపు శ్రీనివాస్. ఆర్థిక భారంతో సతమతమవుతున్న ఒక నిరుపేద కార్మిక కుటుంబానికి పెద్దన్నలా అండగా నిలిచి, ఆ ఇంటి ఆడబిడ్డ పెళ్లిని ఘనంగా జరిపించి తన ఉదారతను చాటుకున్నారు.​సూర్యాపేట జిల్లా, హుజూర్నగర్ మండలం, వేపల సింగారం గ్రామానికి చెందిన వేముల వీరబాబు – సునీత దంపతులు బ్రతుకుతెరువు కోసం నడిగూడెం గ్రామానికి వలస వచ్చి నివసిస్తున్నారు. వీరికి ముగ్గురు కుమార్తెలు. రెక్కాడితే గానీ డొక్కాడని పరిస్థితిలో, పెద్ద కుమార్తె నాగలక్ష్మి వివాహం చేయడం ఆ కుటుంబానికి పెనుభారంగా మారింది. ​మాట ఇచ్చి..మనిషిగా నిలబడి..​వీరబాబు తన వద్ద పని చేసే తోటి కార్మికుడే కావడంతో, అతని పరిస్థితిని గమనించిన మేస్త్రి శ్రీనివాస్ చలించిపోయారు. "నీ బిడ్డ పెళ్లికి నేనున్నాను" అంటూ భరోసానిచ్చారు. ఇచ్చిన మాట ప్రకారం, గురువారం (12-03-2026) జరిగిన నాగలక్ష్మి వివాహ వేడుకకు అయ్యే సుమారు ₹70,000 ఖర్చును తనే స్వయంగా భరించి, పెళ్లిని ఘనంగా జరిపించారు. ​"సమాజంలో తోటి మనిషి కష్టాల్లో ఉన్నప్పుడు సాయం చేయడమే నిజమైన సంపాదన."— వల్లెపు శ్రీనివాస్, తాపీ మేస్త్రి ​​ఒక సామాన్య కార్మికుడై ఉండి కూడా, తోటి కార్మికుని పట్ల శ్రీనివాస్ చూపిన ఈ సేవా భావాన్ని సీఐటీయూ భవన నిర్మాణ కార్మిక సంఘం జిల్లా కమిటీ కొనియాడింది. మండల ప్రజలు, స్థానికులు ఆయనను అభినందనలతో ముంచె త్తుతున్నారు. నేటి సమాజంలో ఇటువంటి మానవతా దృక్పథం అందరికీ ఆదర్శప్రాయమని పలువురు హర్షం వ్యక్తం చేస్తున్నారు